الْــحافْ الدَّافِــي

مَاشي عادي و ماشي نورمالْ..
تكون معيشتنا على هذ الحالْ..
السوق فيه النار و الخدمة والو،الدوا غالي و الناس ماعندهاشْ المال..
برلمانتنا مخدومة،الحكومات مطبوخة مافيها دلالْ..ها الإنتخابات ها الدساتير،ها لهبال ها لهوال..
التلفزيون و جورنال إعلام التدجين و على عقولنا علقوا لقفال..
الشريف لي فيه النيف مكروه و الدلاق اللبويةهوالمواطن الصالح سيد الرجال..
واش راكم عاد عاقلين…؟،
البارح قالولنا غي الصبرو مزال،راه عاد كي جبنا لكم الإستقلال..
عليكم فقط الإتباع و حنا غادي نسكّْدو الأحوال..
صرح الديمقراطية الشامخ سنشيده ككل الدول،سنعمم المساواة و نحقق العدالة فلتكن فيكم الأمال..سنبني السدود بالعزيمة و نحمي الحدود بالأفعال.
كونوا أوفياء و دَعوا القيل و القال..
و حذاري حذاري من السياسة و دروب النضال..
قالوا ناس المجربين دوام الحال من المحال..
و حنا مــازال..
مــازال يا لجماهير الشعبية فطورنا حافي و على عشانا لا تسال..
هما ولادهم ملايكة وحنا ولادنا ضاعوا فالزناقي،و لي بغا يدبر على راسو يخوي عند لاتور إيفال..
أموال الشعب مشات برا و حنا جْيوبنا حالها حال..
حقوق الأغلبية مهضومة و الثراوات ستوْلاوْ عليها لغوال..
و حنا عاجبنا حالنا هكذا مازال..
أخي المواطن أختي المواطنة جبْنا لكم اليوم أروع السناريوهات و الأقوال..
قررنا غسل أدمغتكم بصابون التناوب التوافقي و منين ما فات المخيط يفوت الشريط..
التداول على السلطة و التغيير من اليمين إلى اليسار و من اليسار إلى اليمين،شعار المرحلة أقلب الفيستَ وزيد الجاكيط..
ماكان والو بحال الوجه ًأً ً و الوجه ً ب ً لي ف الكاسيط..
.

.
لحسوا لعضام و نهشوا في لحم القديد و دعيو بالعمر المديد..
و حنا مازال مازال..
راحنا عاد نقولو هذي عيشة المِزيريَّة ماشي نورمال..
مافرحنا ما ربحنا بهاذ الإستقلال..
ما نورتنا ديموقراطية،ما زهاتنا ذيك الوعود و لقوال..
واش دواها يا من تسال..؟؟
.
إ وا غي نيني أ موموعلى طول العام مازال الحال..
ما فيَّقْنا برد الناير و لا حركنا هوا رمضان،ولا دارنا القلب شهر شوال..
نديرو اليد على الخد الجافي،ونتكلمو لكلام بالسان الخافي و الصدر شاعلة فيه لعوافي…تطفيها إن شاء الله غي شي رَكّْدَة فاعلة تاركة فوق اللْحاف الدافي.؟؟؟