Home»National»يا شِيخْ الظَّلمَة،غْليظْ القَلْبْ وَلْقْوالْ VIDEO

يا شِيخْ الظَّلمَة،غْليظْ القَلْبْ وَلْقْوالْ VIDEO

0
Shares
PinterestGoogle+
 

زجل رمضان مصباح الادريسي

يا السَّالك للهْ جْمعْ حْساب الزَّادْ والجّْمالْ
وظهور الخِيل والرّْكاب ؛ وْزِد لَمْنازَلْ وَلْحْوالْ
لَمْسارْ طويل و السَّرْ عْميقْ، دُونُه ْ لَغوال وَلْهْوالْ
فِينْ الحِيرَة، وْقَلْبْ العاشق، انْتَ ياطَالْبْ المُحال
**********
ما انتَ هايمْ ،فْ وَسْعْ الله، رْفيق الطِّير ولْغْزالْ
ما انتَ صاح ِ يا النايَم ؛ يا بُو لِيلْ مَ الطّْوالْ
السَّرّْ فْ نورْ الليل ، نارْ العَشْق وْلْوْصالْ
السر فْ هْسِيسْ الليل ، و ذِكْرْ الله فَ الجْبالْ
***********
يا الراكع غافل ،فين نَبْضْ صلاتك، فينْ القلب والبالْ
يا الساجد لاهِي،بايَعْ شاري، طالبْ لَسْواقْ والمَالْ
يا الصايم ،فينْ تاجْ صْيامك، طْعامْ الفَقْرْ مَ لْحْلال؟ْ
يا حاجْ حَجْ المال ،فين حَجّْ الله،طْهارَة للَرُّوح مَ لْوْحال؟ْ
************
يا لابَسْ الايمانْ، ثُوبْ حْرِيرْ، والقلب اكْحَلْ مَ لْكْحالْ
يا الغافَل وَمْغوفَلْ ،حاسَبْ السِّيفْ لَغْمادْ وَلْحْمالْ
يا الجاهَرْ بَالذِّكْرْ، لَوْدَنْ جارُه،فِينْ لَعْمالْ وَلْفْضالْ؟
يا طالَبْ الجاه ْفْ بِيتْ الله تْبيعْ الدّْوام بَالزّْوالْ

*************
يا الحاسَبْ دِينُه، افْضَلْ مَنْ دين الناسْ،يَكْفر بَالقلْب وَلْقوال
يَقْطَع اعْناق الناسْ،ويْكَبَّر ، يَكْتَبْ شْعارْ الحَقْد بَالنّْصالْ
الدين مْحَبَّة، نورْ،يا شِيخْ الظَّلمة، عاشق الرُّعْبْ وَ النّْزالْ
أدْيانْ مَنْ عَند الله، وَالحق واحد ، يا غْليظْ القَلْبْ وَالْقالْ
***************

سَبحانْ الله فْ أرْضْنا وسْمانا؛سبحان الله فْ لْمْقام والرّْحالْ
سبحان الله جامَعْ خَلْقُه؛سبحان الله تُوبَة ، يامَنْ صالْ وْجالْ
سبحان الله بْحَمدُه، صْلاة الخَلْقْ كُلُّه ؛تَعْصَمْ مَ النّْكالْ
وَصْلاة على النّْبي،شَمْسْ اللِّيل، هْدايَة لِيكْ ف التِّيهْ وَلْحْوالْ
*****************
السَّرّْ فْ نورْ الليل ، نارْ العَشْق وْلْوْصالْ
السر فْ هْسِيسْ الليل ، و ذِكْرْ الله فَ الجْبالْ
خليك هايم ،فْ ملك الله، أهل الله، رْفيق الطِّير ولْغْزالْ

وكل رمضان وأنتم من أهل الله
مستفركي :11 ماي 2018

MédiocreMoyenBienTrès bienExcellent
Loading...

Aucun commentaire

Commenter l'article

Votre adresse e-mail ne sera pas publiée.